Palimos ng Pag-ibig - Pagbubuod at Pagsusuri

 

halaw sa google image.

Maituturing na isang huwarang relasyon ang pag-iibigan nina Fina (Vilma Santos) at Rodel  (Edu Manzano).   Taglay nila ang pagtitiwala,  pagrerespeto at pagmamahalan na inaasahan sa isang dalawang taong nagmamahalan.  Sa kabila nito,   hinangad ng lalake na magkaroon ng isang anak na siyang magpapakumpleto sa kanya at sa kanilang dalawa ni Fina.   Napagdesisyunan nilang itigil na ang pagpipi-pill ni Fina subalit sa pagdaan ng maraming buwan ay hindi pa rin ito nagkaroon ng anak.   Naisipan nilang sumangguni sa isang Doktor at natuklasan nitong mayroong infantile uterus ang babae na siyang naging dahilan sa hindi nito pagkakaroon ng anak.  Isang kundisyon na batid na nitong huli ngunit sadyang inilihim ito sa bana.

Sa kabila ng pagmamahalan at kariwasaan sa buhay,  tila dama pa rin ng dalawa ang kakulangan sa pagkakaroon nito ng higit pang magpapatatag sa kanilang pagmamahalan- ang isang anak.  Hanggang sa may nagpayo sa lalake na mga kaibigan na magbayad na lamang sa isang babaeng maaaring magdadala ng sanggol sa kanyang sinapupunan na mula sa kanyang punla.   Surrogate mother o baby maker,  iyan ang naging sagot sa pangangailangan ni Rodel sa kanyang ninanais.  Nakuha niya iyon sa isang maganda at mabait na babaeng nagngangalang Ditas (Dina Bonivie).  Hindi nagdalawang isip ang babae sa hangaring ang perang iaabot ay makakatulong sa kanya para sa pag-ahon sa pagkakasadlak nito sa kahikahusan sa buhay.   Kung dati-rati ang layon lamang ng lalake ay ang babaeng magdadala lamang ng kanyang anak na aabutan lamang niya ng pera matapos makapagsilang pero habang tumatagal ay nakadama na siya ng paghanga at pagmamahal sa dito dahil taglay nitong  kabaitan.    

Pinalabas ng lalake na ang batang si Regie ay ampon niya at hindi niya ito sariling anak.   Pinagselosan ni Fina ang bata dahil hindi na ito ang kawangis ng ipinangako ng lalake sa kanya na kahit wala silang anak ay siya pa rin ang tuturingan nitong baby.  Ibinuhos na ang atensyon sa batang higit pang nagpapasaya sa kanya,  yaon ang makikita kay Rodel. Nauwi sa hindi pagkakasundo ng dalawa dahil pinangingibabawan siya ng pagkamuhi at matinding selos.  Nadama ng babae na tila ang babae (ina ni Regie) ang niyayakap ni Rodel sa tuwing niyayakap nito ang bata.    Dahil sa inasta ni Fina ay unti-unti nababawasan ang pagtingin ng lalake sa kanya hanggang sa ito ay muling nakipagkita kay Ditas at ang pagkikitang iyon ay naging dahilan sa pagkakaroon nila ng panibagong anak.  Ikinatuwa ni Fina ang sanggol na pinangalangan niyang Pearly na natagpuan niya sa kanilang hardin sapagkat naisip niya na magagamit niya iyon para makaganti sa asawa na maipagmamalaki niyang sarili niya rin itong anak.  Lingid sa kanyang kaalaman na anak iyon ni Ditas at ni Rodel na muli niyang ipinagkakatiwala sa kanila ang pangangalaga.

Nagpakita ng pagbabago si Fina batay na rin sa payo ng kaibigang matalino naman siya dapat handa niyang tanggapin ang katotohanan.  Ngunit ng makita nito na dumadalaw si Ditas sa kanilang gate ay nakiusap ito na mailayo na si Regie sa kanila para walang rason na magkita sila ni Rodel.  Hindi ito sinang-ayunan ni Rodel na mailayo sa kanya ang anak na lalake at siyang naging dahilan ng kanilang hindi pagkakasundo hanggang mapaalis si Rodel dahil sa matinding galit nito at pagseselos.  Walang nagawa si Fina kahit pakiusapan niya ito na bumalik.  Nagulumihanan at nanlumo si Fina na siyang nagtulak sa kanya na uminom nang napakaraming pill at ito ay na-ospital dahil sa pagka-overdose.  Sa bandang huli,  nangibabaw pa rin ang pagmamahal ni Rodel kay Fina at sila pa ring dalawa ang nagsama kapiling ang ipinagkatiwalang mga anak ni Ditas.        

Tinalakay sa nasabing pelikula ang usaping surrogate mother o baby maker.  Mapapansin na sa ating lipunan ay mayroon ng mga babeng nagsasagawa ng ganitong trabaho dulot na rin ng kahirapan.  Ang katauhan ni Ditas ay sumisimbolo nito bagaman walang usapin ang gaanong inilatag nais lamang na inilarawan sa pelikula na sa mga lalakeng naghahangad na magkaroon ng anak ay ang mga babaeng baby maker ang makakatugon sa kanila sa suliraning hindi pagkakaroon ng anak.  Pangalawa,  ang pagiging makasarili ni Ditas ay isang hindi magandang larawan ng isang asawa.   Nais lamang ni Rodel na magkaroon ng anak kaya naggawa niyang magbayad ng isang baby maker.  Bagaman mayroon siyang pagkukulang din dahil inilihim niya ito sa babae dulot na rin ito ng takot na hindi siya mapayagan ng babae sa kanyang gagawin.   Si  Fina na kahit si Regie na walang kasalanan ay napagbubuntungan niya rin ng galit dahil sa matingding pagseselos ay hindi magandang imahe para sa isang ina o taong may pagmamahal.  Sinasakal niya si Rodel kahit malinis naman ang intensyon nito at mahal na mahal niya si Fina.  Suportahan ang minamahal at iwasan ang pagkakaroon ng obsesyon nito sapagkat likas sa isang tao na mapaghanap ng kalayaan at kaligayahan.   Pangatlo,   Sa mga usaping hindi pagkakaroon ng anak ng dalawang magkapareha ay maaari pa ring opsyon ang pag-aampon ng bata sa halip na humanap ng ibang sasamahan sapagkat maaari lamang itong magpalabo sa isang relasyon.  Sa usapin nina Rodel at Fina sila ay kasado at paglabag sa batas at sa mata ng Diyos ang pakikiapid sinuman sa kanilang dalawa kanino man.  Magkagayunpaman,     mainam parin ang naging wakas nito dahil nagkaloob pa rin ng kapatawaran sa puso ni Rodel na minsan gaano man katatag ang relasyon ay sinusubok ito ng pagkakataon.  Higit sa lahat,   kailangan lamang na maging mapagkumbaba sa isa’t isa at pag-usapan ang mga bagay-bagay na hindi napagkasunduan magkaroon ng win-win situation sa halip na pairalin ang pride na siyang sisira sa magandang nabuong samahan.